Mari Domingiren Errepublika Magikoa Euskal Herriko betiko tradizioak eta egungo jendartearen izaera, desio nahiz erronkak uztartzen dituen esperientzia magikoa da. Aurten hirugarrenez, Añabitarte Baserria (Zamalbide auzoa, 14. Orereta-Errenteria) Mari Domingiren etxe bihurtuko da eta haren inguruko zelaiguneak xarmaz, iratxoz eta baratzezainez beteko dira. Añabitarteren historia eta istorioak kontatzen dituen ibilbidea eginez (40-45 minutu), Mari Domingiren etxea bisitatuko dute Añabitartera etortzen direnek. Mari Domingirekin berriketan aritu, gutuna eman eta salda bero bat hartzeko aukera izango dute.
Mari Domingi da errepublika magikoaren zaintzailea, Eguberri-berriena egi bihurtzen duen jeinua. Laguntzaileak ere baditu, noski: galtzagorri bihurri bezain jatorrak. Olentzerorik ez da izango han. Eguberri garaia gertu dela eta, Mari Domingik mendian urrun duen bizilekua aldi baterako utzi eta herritik gertuago dagoen etxe baten beharra duela adierazi dio Orereta Ikastolari eta Añabitarte Baserria eskaini zaio aste batzuetarako. Olentzerok badu berea eta han egongo da hura.
Abenduaren 6tik 22ra zabalik, hala nahi duen familia ororentzako
Mari Domingiren Errepublika Magikoa abenduaren 6tik 22ra egongo da zabalik, ostiral, asteburu eta jaiegunetan. Aurrez sarrera erosi behar da bisitan etortzeko www.maridomingi.eus webgunean; azkenak geratzen dira salgai. Hala nahi duen herritar orori egin nahi zaio Mari Domingirengana bisitan etorri eta hari eskutitza emateko gonbita.
Mari Domingiren Errepublika Magikoa: emakumea eta natura ardatz
Olentzeroren ostean iritsi da Mari Domingi gurera, eta haren itzalpean heldu da: haren emazte, laguntzaile edo lagun gisa. Olentzero behar izan du existitzeko. Pausoa eman nahi da bide horretan, Mari Domingiri izaera propioa eman berez eta nahi duen bezala existitzeko, genero eta familia eredu jakinei lotu gabe. Eguberrien izaera paganoan eta ospakizunak naturaren zikloekin duen harremanean ere jarri nahi da azpimarra. Egiteko asko dagoenaren jakitun, bide horri ekarpena egin nahi dio Orereta Ikastolak egitasmo honekin.
