ETAPA MAILAKOAK
DBH1 | Zirko tailerra
Calendarren ikusiko zenuten bezala, datorren asteazkenean, martxoak 1, DBH1eko Jolasa eta Kirola irakasgaian bi orduko Zirko Tailerra izango dugu Xomorro Taldearen eskutik. Hori dela eta, irakasgai horretan dauden DBH1eko ikasle guztiek 2. ordua eta 3. hasierarik ez lukete izango. Tailerra 08:00etatik 10:00ak bitartekoa da.
Martxoko klaustroa
Hona hemen hurrengo asteazkenean landuko dugun klaustro laburrari dagokion gai zerrenda. Ordubete dugula ikusita, ahalik eta lasterren etortzeko eskaera egiten dizuegu. Hona hemen, bestalde, azken klaustroko akta ikusgai.
- Lekua: Liburutegian
- Ordua: 14:05ean
IKT: ordezko ordenagailuak
Dakizuenez, zenbait ikasleren pantailak hautsi dira, eta hortaz, ordezko ordenagailuen deboluzioa mantsotu egin da, konponketa lanetan ari baitira. Beraz, ikasleei ordenagailuak arretaz erabiltzeko insistentzia eta laguntza eskatu nahi dizuegu. Horrez gain, tutoretzan gogoraraziko zaie, ordezko ordenagailuen kargadoreak itzuli behar dituztela.
LHko joan-etorriak
Ikasleen LHko joan-etorriak direla eta, ugaritzen ari direnez, gogoan izan honako erabaki hau: ostiraletan soilik izango dute ikasleek horretarako baimena, eta soilik, tutorearen onarpena baldin badute igoko dira, ez bestela. Hori dela eta, kontuan izan gela anitzetako ikasleak nahasita igotzen baitira, baimen bateraturik ez dute izango-eta.
Hizkera ez sexista formazioa | Materiala
Ikertze eta Sorginlorerekin eginiko saioen dokumentazioa hemen duzue eskuragarri. Egoera jakinei buruzko hainbat erabaki hartzea dagokigu segidan, eta eskainiko diogu horretarako tarteren bat aurrerantzean. Beraz, interesgarria izango zaizuelakoan, ikusgai dituzue dokumentazioa eta orain arteko saioetan erabilitako euskarriak.
3E gelako leihoak
Aitor Arbelaitzek beleak uxatzeko jarritako hesiak-edo hausten ari dira ikasleak, hori dela eta, bertan sartzen zareten irakasleek leihoak parez pare irekita EZ uzteko eskatu nahi dizuegu. Fatxadatik euria eta haizea egitean ura sartzen da, beleek bertako isolatze goma kendu egiten dutelako. Beraz, kanpoaldekoa konpontzea beharrezkoa da barrualdean eragin ahal izateko. Adi egoteko eskatzen dizuegu, beraz.
Lilaton, bazkari proposamena
Martxoaren 5ean Lilaton lasterketa dela-eta, segidan Gastronomikan bazkaritxo bat egiteko proposamena luzatu dute hainbat kidek. Hori dela eta, izena eman nahi duenak bi irakasle geletako arbelean eman dezake. Animatu!
IKASTOLA MAILAKOAK
Matrikulazioa 23-24: emaitzak
Gaur arratsaldean itxiko da 2023-24 ikasturterako matrikulazio-kanpaina. Anartzek, zuzendaritza-taldearen izenean, emaila bidaliko digu emaitzen berri emanez.
2023-24 ikasturtea: baimen eskaerak
2023-24 ikasturtea antolatzen hasteko garaia hurbiltzen ari denez, plangintza eta antolaketarik egokiena egin ahal izateko, langileen asmoen berri izan behar du zuzendaritza-taldeak. Horiek horrela, datorren ikasturterako aparteko eskaerarik egiteko asmoa izango bazenu, bete langile atarian topatuko duzun inprimakia. Martxoaren 10a da horretarako azken eguna.
Ordainketa eskuordetua: behin behineko azken soldata igoeraz
Urtarrilaren 27ko asteko oharretan adierazi bezala, urtarrileko nominan aplikatu zen behin-behineko %2,5eko soldata-igoera.
Ordainketa eskuordetuak otsailean aplikatuko du %2,5eko igoera hori. Horiek horrela, igoera hori iritsi arteko soldata-diferentzia Ikastolak bere gain hartu duenez, soldataren zati bat ordainketa eskuordetutik jasotzen duzuen langile batzuek (ez denek), nomina negatiboa izango duzue otsailean. Hori bada zure kasua, ez egin itzulketarik: Ikastola bera arduratuko da hurrengo egunetan hala dagokizuenei kargua egiteaz.
Lilaton 2023: egin korri Ikastolako taldearekin!
Duela hiruzpalau urte ekin zioten Orereta Ikastolako DBH eta Oiartzoko hainbat ikasle zein irakaslek “Lilatonen” parte hartzeari, elkarrekin igande goiza pasa eta aldarrikapena eta kirola uztartzeko asmoz. Orain arteko esperientzia oso atsegina izan denez, aurten ere, emango diogu jarraipena hasitako bideari. Berezia izango da, gainera, Kilometroak urtea eta Ikastolaren 60. urteurreneko edizioa izango baita.
Orain aste batzuk gonbidatu zintuztegun Ikastolako emakumeak “Lilatonen” izena ematera, laster Ikastolako taldearen berri izango zenutela aurreratuz. Eta hemen gara: “Lilatonen” izena eman (ez da dortsalik geratzen, atzo amaitu ziren) eta Ikastolako taldearekin korri egin nahi duten emakumeek Erriola kamiseta doan jasoko dute. Horretarako, ezinbestekoa da langile atariko hala dagokion inprimakian izena ematea. Horrez gain, martxoaren 5ean, argazki berezia aterako dugu denok batera.
Horratx erronka: baietz Orereta Ikastolak dituen urte adina emakume korrikalari batu taldera! 60 baietz! Anima zaitez, eta anima itzazu zure inguruko emakumeak!
Izena ematen duzuenoi aparteko jakinarazpena helaraziko dizuegu aipatutako guztiaren inguruko xehetasunak jakinarazteko.
Prestakuntza: eskaintza berria
Hainbat ikastaro berri topatuko dituzue langile atarian (prestakuntzaren atalean).
Iñude eta Artzaiak: 25 urte pasatxoko ibilbidearen amaiera
Azken urteetako ohiturari jarraituz gero, otsailaren 26an, Inauteri osteko igandean, Iñude eta Artzaien konpartsaren desfilea egingo genukeen erdiguneko kaleetan barrena herriko hainbat eragilerekin batera.
Aitzitik, hainbat gogoeta, bilera eta eboluzio saiakeraren ostean, hainbat motibogatik eta COVID-19ak eragindako pandemia ere tarteko, orain 25 urte pasatxo hasitako ibilbideari amaiera heldu zaiola jakinarazten dizuegu. Ikastolak ez du aurrerantzean Iñude eta Artzaien konpartsarik eta desfilerik antolatuko.
Zinez eskerrak eman nahi dizkizuegu urte hauetan guztietan Iñude eta Artzaien konpartsaren desfilea, modu batera edo bestera, posible egin duzuen guztiei.
Azpimarratu nahi dugu Ikastolak jarraituko duela ikastolakideekin eta ikastolakideentzako, herritarrekin eta herritarrentzako, ekimenak proposatzen, egiten, sustatzen eta herriko eragileekin elkarlana bultzatzen; herriari ekarpena egiten jarraitzeko saiakeran.
Kilometroak 23: online denda martxan da!
Herriko enparantzako 11. zenbakian dagoen dendaz gain, orain arropa eta osagarriak internetez erosteko aukera ere bada www.kilometroak.eus webgunean. Gauza mordoa topatuko duzue bertan, adin, tamaina eta gustu guztietarako modukoa. Erriola janzteko eta gozatzeko aukera bikaina klik bakarrean, baita berritasunen berri izatekoa ere. Jantzi Kilometroak eta Erriola, eta animatu zure hemengo eta hango ezagun eta gertukoak ere horretara, jada dendara joatea ez baita ezinbestekoa!
Kilometroak 23: “Egunkariatik Berriara, 20 urte” ekimena prentsan
- “Egunkaritik Berriara, 20 urte” astea: Herribizia | Hitza | Noticias de Gipuzkoa | Diario Vasco | Hitzokei (ETB1) | Kultur Leihoa (Euskadi Irratia) | Kultura.eus (Radio Euskadi) | Faktoriako tertulia (Euskadi Irratia) | Kultursharea
- “Egunero behar genuen” liburuaren aurkezpena: Gaur Egun
- Egun Oro: Hitza | Berria
- “Kantu bat gara”: Diario Vasco
BESTELAKOAK
Oarso 2023 urtekarirako lanak aurkezteko epea zabalik
Ohi gisan, Oarso urtekaria uztailean emango da argitara, Madalenak hasi baino lehentxeago. Udalak eta Oarso aldizkariaren erredakzio batzordeak bertan parte hartzeko deia zabaldu dute. Lanak aurkezteko epea maiatzaren 15ean amaitzen da. Xehetasunak eta oinarriak: https://herribizia.errenteria.eus/
