ETAPA MAILAKOAK
Mila kilo zorion
Mila kilo zorion
dizugu eskaintzen,
beste urte berri bat
duzulako hasten.
Baietz asmatu zenbat
dituzun betetzen,
zergatik ez ditugu
txaloka kontatzen?
Mikel Zabala: irailak 28
Bidaide eta euskara errefortzua
Irailaren 25ean, astelehena, hasiko dira Bidaide eta Euskara errefortzuko saioak. Ainhoa Otegi irakaslea arituko da ikasle hauekin lanean aurtengo ikasturtean.
Gogoratu saio hauetan parte hartu ahal izateko ikasle hauen gurasoek sinatutako “kontratua” helarazi behar digutela.
Calendarren xehetasun gehiago.
KMK prentsan
“Diario de Noticias”ek KMK bezperan gehigarri bat ateratzen omen du. Astelehenerako ikasleek baimena sinatuta ekarri beharko dute. Ekarri ezean ezingo dute argazkietan atera. Tutore bakoitzak argazkiak zein ikasleri bai eta zein ikasleri ezin zaizkion atera garbi izan beharko du.
Asteazkena, irailak 27, 10:30-11:30era etorriko dira argazkiak ateratzera.
Sortaldeak martxan
Datorren ostegunean, sortaldeak martxan jarriko ditugu. Hori dela eta, irakasle geletan izango duzue sortalde bakoitzean zein irakasle izango den.
Familien hizkuntza paisaia
Guraso bilera orokorretan, zuen gelako familien hizkuntza paisaia zein den jakiteko HEMEN duzue iaz bete genuen galdetegia.
NJPen garrantzia
Gogoratu NJPak irekitzea eta hauen jarraipena egitea oso garrantzitsua dela. Lan hau, tutorearen lana izan arren, ikaslearen irakasleek ere (espezialistek) NJPan egokitzapenak egin eta erregistratu behar dituzte tutorearekin koordinatuz.
Klaustroan aipatu bezala, iazko ikasleen NJPak irekita egon behar dute dagoeneko. LH1eko ikasleen kasuan berriz, gogoratu oraingo tutoreek ireki behar dituzte.
Gogoratu, aldi berean, iaz gairen bat suspendituta gelditu zen kasuetan ere NJPak irekia egon behar duela.
KMK girotze astea
Azken astea dugu egun handiaren aurretik!!
Hona hemen aste honetan zehar gure ikasleekin lantzeko berotze eta girotze jarduerak.
Bestetik, datorren astean zehar, muntaketa lanak izango ditugu egiteko eta denon laguntza ezinbestekoa izango da!
Erregistro orriak
2022-23 ikasturteko erregistro orriak entregatu gabe zituzten batzuek. Ahal bezain laster entregatu behar dira.
Baja motzak direnean erregistro orrian “baja” idatzi behar da egun horietan. Baja luzeak direnean, aitatasun edo amatasun bajak esaterako, ez dira erregistro orriak bete behar.
“Irale” bezalako ikastaroetan gaudenetan ere ez dira entregatu behar.
Asteko kanta
Urriaren 1ean, Kilometroak Eguna ospatuko dugunez, aste hauetan zehar, Janus Lesterren “Erriola” kanta entzungo dugu: https://youtu.be/99_4qj9Zd9c
IKASTOLA MAILAKOAK
Lan-eskaintza: Gorputz Hezkuntzako irakaslea (DBH)
Unai Briñasek Orereta Ikastolako bere ibilbidea amaitu du; hemendik aurrera, beste bide bati ekingo dio. Eskerrik asko eta zorte on!
Hori esanda, jakizue utzitako lanpostua (DBHko Gorputz Hezkuntzako irakaslea) betetzeko hautaketa-prozesua martxan jarriko dugula. Gaurtik aurrera, oreretaikastola.eus webguneko gurekin lan egin atalean dago lan-eskaintzan izena emateko aukera (langile atarian ere baduzue zuzeneko lotura). Ikastolako langileei eman zaie lehenik deialdiaren berri, datorren astean zabalduko da familien artean eta sareetan. Hautagaiak bere CVa webgunean erregistratu behar du, urriaren 4a da horretarako azken eguna.
Prestakuntza eta jardunaldiak: eskaintza eguneratua
Ikasturte hasiera izanik, hainbat prestakuntza eta jardunaldiren berri izan dugu. Langile atarian (prestakuntzen eta jardunaldien atalean) topatuko duzue horien guztien berri.
Kilometroak Eguna (urriak 1): parte hartu Erriola koreografia erraldoian!
Urriaren 1eko Kilometroak Eguneko lehen hitzordua hasiera ekitaldia izango da. Aurten ibiltaria izango da ekitaldi hori: Lekuona Fabrikaren paretik Emakumeen Etxera joango da, “AMA” (amalurra, ama euskara, Ikastolako amak..) ardatz hartuta eta ibilbidean hainbat geldialdi eginez.
Linoko (Lehendakari Agirre plaza) geldialdian, besteak beste, Erriola kanta abestu eta dantzatuko dugu denok elkarrekin; hala nahi duen ikastolakide eta herrikide orok elkarrekin.
10:15ean elkartuko gara Linon eta 10:45erako amaituko dugu. Boluntario gisa lanean aritzeko izena emanda baduzue ere, lasai har ezazue tarte bat Erriola koreografian parte hartzeko; laburra izango da dantza-saioa eta, beraz, bateragarria boluntario-lan ia denekin. Eskertuko genizueke, antolaketa kontuengatik, dantzan eta kantuan parte hartzeko asmorik izanez gero, langile atariko hala dagokion inprimakia betetzea.
Erriola arropa eta osagarriak jantzi, eta has dezagun Kilometroak Eguna denok elkarrekin! Anima zaitezte!
Kilometroak Eguna (urriak 1): zatoz laguntzera!
Boluntarioak behar ditugu urriaren 1eko Kilometroak Eguna hitzordu bikaina izateko. Ari gara lantaldeak eta txandak osatzen, borobildu eta errematatzea falta dugu. Behar zaitugu, behar zaituztegu; esku guztiak izango dira ongi etorriak.
Langile atarian duzue izena emateko aukera; oraindik ez baduzue egin, egizue! Gunez gune daude zeregin guztiak xehatuta, baita zenbat boluntario behar den lan bakoitzerako ere. Zatoz elkarlanean aritzera eta gozatzera! Elkarrekin eta elkarrentzako! Eskerrik asko, aldez aurretik!
Kilometroak Eguna (urriak 1): anima itzazue zuen ingurukoak ere Kilometroak Egunaz gozatzera!
Atzo aurkeztu genuen prentsaurrean urriaren 1eko Kilometroak Eguna. kilometroak.eus webgunea erabat eguneratu da Kilometroak Eguneko xehetasun guzti-guztiak esku-eskura izateko. Anima itzazue zuen ingurukoak ere urriaren 1eko festa ederraz gozatzera!
ETAPA ARTEKOAK
DBH | Ikastolara oinez, Autorik Gabeko Nazioarteko Egunean
Gaur, irailak 22, Autorik Gabeko Nazioarteko Eguna denez, eta Orereta Ikastolaren izaera berdea kontuan hartuz, DBHko ikasle zein irakasleak oinez igo dira hirigunetik Ikastolara; eta hala jaitsiko dira bueltan ere.
Hiru irteera gune izan dituzte goizean: Esmalteria plaza, Zumardiako kioskoa eta Fanderia. Ikasle bakoitza gertuen zuen gunera joan da (Berakoak erdigunean jaitsi dira autobusetik) eta irakasleen laguntzaz, taldean, Ikastolara igo dira. Añabitarte inguruan bizi diren ikasleak bidean batu dira taldera. Eskolak amaitzean, beherako bidea ere jangelako erabiltzaileek ez beste guztiek elkarrekin egingo dute.
Denen artean, eta sinbolikoki bada ere, irailaren 22an DBHko eremua autorik eta autobusik gabeko gunea izatea lortuko dute. Bejondeizuela!
BESTELAKOAK
Ipar Euskal Herrian haurtzaindegi euskaldunak izateko diru-bilketa kanpaina
Ipar Euskal Herrian euskaraz ari diren haurtzaindegiak ez dira % 5 ere. Egoera hori izanik, lehen haurtzaroan murgiltzea garatzea xede duen Konkolotx elkarteak haurtzaindegi euskaldunak izateko diru-bilketa jarri du martxan; gaur gaurkoz, erakunde publikoek ez dutelako laguntzen. 10.000€ lortzea da helburua. Hala nahi izanez gero, kanpainaren gaineko xehetasun gehiago eta ekarpena egiteko aukera hemen topatuko duzue.
Berria egunkariaren Mantangorri gehigarria, orain sarean ere eskuragarri
Berria egunkariaren Mantangorri gehigarria sareratu da aste honetan. Orain arte larunbatero paperean argitaratu izan diren eduki guztiak eskuragarri dira www.berria.eus/mantangorri webgunean; ipuinak, bideo formatuan ere bai. Irrien Lagunak taldekoek proposatzen dituzten eskulanak, esperimentuak eta bitxikeriak ere badira; eta beste hamaika gauza.
