Gai hauek landu dira 2023ko maiatzeko Artezkaritza Kontseiluaren bileran.
Kilometroak 2023
Datozen hilabeteetako ekimenak lantzen ari da lantaldea.
UZTAILAK 19: URMUGA-“GURE AÑABITARTE” EKIMENA
Uztailaren 19an, Urmuga Festibalarekin elkarlanean, kontzertu handia izango da Añabitarte baserriaren inguruan. Urmugak natura eta musika uztartzen ditu eta mendi eremu ezagunetan egiten ditu kontzertuak, Euskal Herriko musikari eta abeslariekin. Aurten, geldialdi horietako bat Añabitarten izango da. Hain zuzen ere, aurten 50 urte dira Ikastolako familiek eta herritarrek Añabitarteko lur eremua erosi eta bertan Ikastolako eraikin nagusiak zutitzeko lanak hasi zituztela. Añabitarte eta baserria gure komunitatearen bihotza eta topagunea izanik, kontzertu honekin ospatu nahi da urteurrena. Kontzertuaren ostean, baserrian zerbait afaltzeko aukera egongo da erromeria ba.
Goizean, Urdaburu eta Girizia Mendi Taldeek antolatuta, mendi ibilaldiak izango dira, Hendaia eta Irun lotzen dituen Santiago zubitik eta Endarlatsatik Oiartzungo Gurutze auzora. Eta arratsaldean, Albaolako patatxa ontzia iritsiko da San Pedrotik Lekuona ingurura, Hibaika Arraun Taldeko arraunlariek lagunduta, musikariekin batera. 17:00etan, errio gaineko kontzertu batez gozatzeko aukera izango da Lekuona Fabrikaren parean.
Artezkaritza Kontseiluak ikastolakideak Añabitartera igotzera eta beren ingurukoen artean ekimenaren berri zabaltzera gonbidatzen ditu.
Ekimenari buruzko xehetasun gehiago: Kilometroak webgunean eta Urmuga ekimenaren webgunean.
URRIAK 1: URRIAREN LEHEN IGANDEKO KILOMETROAK JAIA
Eguna antolatzen hasia da lantaldea. Ikastolako buru eta esku guztiak behar izango dira gurera hurbiltzen direnei harrera egiteko eta haientzat eta gure komunitatearentzat egun zoragarria antolatzeko. Artezkaritza Kontseiluak ikastolakide guztiak gonbidatzen ditu boluntario gisa lanean aritzera (izena emateko esteka).
Oiartzoko berriak
Udalak Oiartzoren aurrealdeko eraikina hustu du eta Hezkuntza Sailari laga dio, bertan lanbide heziketari lotutako bulego batzuk jartzeko. Eraikina konpondu eta egokituko dute, zeregin horretarako.
Oiartzoko eraikinean irisgarritasuna bermatzeko igogailua jartzeko lanak 2023ko uztailean hasiko ditu Udalak.
Hezkuntza ereduez
2023-2024 ikasturterako, ereduen afera konponduta egongo da.
Bestalde, datorren ikasturteari begira, Hezkuntza Bereziko baliabideei dagokienez, DBHrako espero zena baino baliabide gutxiago aurreikusi ditu Hezkuntza Sailak Orereta Ikastolarentzat. Beste Ikastola askok bezala, uko egin zaio ofiziozko proposamenari hezkuntza bereziko baliabide horiek handitzeko asmoz.
Pertsonen kudeaketa
Pertsonen kudeaketako arduradunaren lanpostua beste urtebetez luzatzea onartu du Artezkaritzak. Azken bi urteetan aurrerapauso handiak egin dira pertsonen kudeaketa hobetzeko, baina beste pauso batzuk falta dira, besteak beste, hautaketa prozesuetan, prestakuntza planetan, ebaluazio eta aintzatespen arloan, langileen atarian. Eginkizun horiek eraman nahi dira aurrera datorren ikasturtean.
Istripu asegurua
Ikasleen artean gertatu ohi diren istripu txikiak estaltzeko ikasleen istripu poliza kontratatu ala ez aztertu zen duela ikasturte batzuk eta ezezkoa izan zen erabakia, oso gorabehera gutxi gertatzen zirelako. Ikasturte honetan, denbora gutxian, bi kasu izan direnez, Artezkaritzak erabaki du gaia Guraso Batzordeetan lantzea, erabakia hartu aurretik.
Herri Arte Eskolaren eskaintza Ikastolan
2023-2024 ikasturtean, Herri Arte Eskolak proba pilotu bat egingo du herriko ikastetxeetan, bere eskaintza ikasleei hurbiltzeko. Orereta Ikastolari dagokionez, hiru ekintza eskainiko zaizkie Lehen Hezkuntzako 3. eta 4. mailako ikasleei: Hitza, Dantza garaikidea eta Arte Plastiko-ikusizkoak.
Ikastolaren Eguna
Ekainaren 3an ospatuko da Ikastolaren Eguna, Añabitarten. Etapa bakoitzak bere ikuskizuna prestatu beharrean, aurten Erriola ikuskizuna prestatzen ari dira ikasleak eta irakasleak, gure Ikastolaren eta Kilometroak-en arteko lotura gogoratzeko.
Iaz bezala, bazkaria norberak ematekoa izango da, eta baserrian edariak eta pintxoak salduko dira.
Artezkaritza Kontseiluak ikastolako familia guztiak gonbidatu nahi ditu elkarrekin gure Ikastolaren Eguna ospatzera. Era berean, eskerrak eman nahi dizkie eguna antolatzen ari diren familia eta langile guztiei.
