Etapa mailakoak
Mila kilo zorion
Mila kilo zorion
dizugu eskaintzen,
beste urte berri bat
duzulako hasten.
Baietz asmatu zenbat
dituzun betetzen,
zergatik ez ditugu
txaloka kontatzen?
- Otsailak 8: Arantza Garmendia
- Otsailak 12: Alaitz Lete
Inauteriak
Hemen duzue Ospakizun Batzordean inauterien inguruan hartutako azken erabakien berri (desfilearen irteerako kokapena, beheko zelaiko kokapena…) ematen duen dokumentua.
Oiartzoko ikasleen ikerketa
Psikologia arloko Oiartzoko ikasleak ikerketa bat gauzatzen ari dira gure ikasleekin, LH 4., 5. eta 6. mailetan.
Duela aste batzuk, geletako jarduna nolakoa zen ikusteko behaketak egitera etorri ziren. Ikerketa horrekin jarraitu eta ondorioak jasotzeko, gure ikasleek galdetegi bat betetzea nahi dute.
Oiartzoko ikasleen bisita izan zenuten geletan, hortaz, ikasleei galdetegia pasatzea eskatzen zaizue, datorren asteko tutoretza saioan, esaterako. Datorren ostiralerako galdetegiak erantzutea eskatu digute.
Esteka honetan duzue ikasleekin partekatu beharko duzuen galdetegia.
Geletako argiak eta leihoak
Atzoko klaustroan, argi indarraren kontsumoan izandako bilakaera jakinarazi arren, arratsaldean hainbat geletako argiak piztuta eta leihoak irekita utzi ziren.
Egoeraren larritasuna aintzat hartuta, komeni zaigu gogoratzea azken klasea ematen duen irakaslearen ardura dela argia itzaltzea eta leihoak ixtea.
Egoera hori betetzen ez bada, azken klasea ematen duen irakaslea izanen da hutsegitearen arduraduna, eta kargu hartuko zaio idatzizko jakinarazpen baten bidez.
Asteko kanta
Otsailaren 11n Emakume eta Neska Zientzialarien Nazioarteko Eguna ospatuko da. Honako egun hau Nazio Batuen Erakundeak izendatu zuen 2015ean. Historian zehar, hainbat emakumek bere bizitza osoa eman dute ikertzen, modu honetan aurkikuntza handiak eginez. Hala ere, aurkikuntza horien artean gehienak gizonezkoei egotzi izan zaizkie, emakumeek ezin zutelako zientziaren munduan paper protagonistarik hartu.
Asteko kanta Zea Maysen “Elektrizitatea” izango da: Aiora Renteriaren emakumezko ahotsa, zientzia gai baten inguruan.
Ikastola mailakoak
Matrikulazio-kanpaina 2023-24: hainbat ohar
TESTUINGURUAREN AURRETIAZKO AZTERKETA
Batzuek jaso dituzue eta besteek datorren astean jasoko dituzue (klaustroetan) matrikulazio-kanpaina martxan jarri aurretik egin ohi dugun herriko testuinguruaren azterketaren azpimarra nagusiak. Hala nahi izanez gero, xehetasunak hemen dituzue ikusgai.
INFORMAZIO ZABALTZEKO LAGUNTZA-ESKAERA
Zuen inguruan interesa izan dezakeen edonori Ikastolari lotutako informazio hau helarazten laguntzea eskertuko genizueke.
- 2023-24 ikasturterako matrikulazio-garaia: otsailak 13-24
- Ate irekiak (HH): otsailaren 6an (euskaraz) eta 9an (gaztelaniaz), 17:30ean Esmalterian
- Talde txikitako bisitak (HH) eta bakarkako hitzorduak (HH, LH eta DBH): www.oreretaikastola.eus
- Informazio gehiagorako: 943 52 03 97 edo matrikulazioa@oreretaikastola.eus
HERRIKO HEZKUNTZA ZINEGOTZIAREN AGERRALDIA ADMINISTRAZIOPEKO HIRU IKASTETXEEKIN
Urtero legez, herriko hezkuntza zinegotziak agerraldia egin du aste honetan administraziopeko hiru ikastetxeetako zuzendariekin. Hemen irakur dezakezue albistea. Aldiro adierazten dugu Ikastolak ere eskertuko lukeela babes hori, baina ezezko erantzuna jasotzen dugu.
Kilometroak 23: hainbat aipamen
KILOMETROAK TXIKIA
Pasa den urtarrilaren 28an ospatu genuen Kilometroak Txikia, Kilometroak urteko lehen hitzordua. Eskerrik asko hura posible egin zenuten langile guztiei! Langile atarian topatuko dituzue laburpen-bideoa eta argazki-galeria.
URTEKO MUGARRI NAGUSIEN AURKEZPENA
Pasa den astean aurreratu bezala, herriko eta Euskal Herriko hainbat eragilerekin batera Kilometroak urteko mugarri nagusiak aurkeztu ditugu aste honetan Lekuona Fabrikan. Langile-atarian topatuko dituzue agerraldiaren bideoa eta mugarri nagusien nondik norakoak.
SANTA AGEDA BEZPERAKO KOPLAK
Ohi legez, Santa Ageda bezperan, bihar, kopla kantari ibiliko dira Ereintza Elkartea eta Xenpelar bertso eskola. Urtero, kantubiraren amaieran, urteko azpimarraren bat izaten dute hizpide eta aurten Kilometroak izango da horietako bat. Propio guretzako egindako bertso batzuk kantatuko dira herriko enparantzan, gaueko 21:00ak aldera. Gustu baduzue, gonbidatuta zaudete hitzordura.
Lilatoia: emakumeok, anima zaitezte!
Ziurrenik askok jakingo duzuenez, DBHko hainbat ikasle zein irakaslek Lilatoian parte hartzeari ekin zioten orain hiruzpalau urte, elkarrekin igande goiza kirola eginez pasa eta aldarrikapenez betetzeko asmoz.
Orain arteko esperientzia oso atsegina eta asegarria izan denez, aurten ere, jarraipena eman nahi zaio. Martxoaren 5ean izango den Lilatoian parte hartzeko asmoa dago eta zuek, Ikastolako langile emakumeok, ere horretara animatu nahi zaituztegu. Ikastolako taldera batzera.
Ikastolako taldearen xehetasunak aurrerago emango dizkizuegu, Kilometroak urtea eta Ikastolaren 60. urteurrena ere badenez gauzak prestatzen baikabiltza. Bien bitartean, ezinbestekoa da www.lilaton.es webgunean izena ematea lehenbailehen; dortsalik gabe ez geratzeko. Egizue hori orain eta, esan bezala, laster izango duzue gure berri. Horratx erronka: baietz Orereta Ikastolak dituen urte adina emakume korrikalari batu taldera!
Formazioa eta prestakuntza: eskaintza berria
Lanbidek antolatutako ikastaro batzuen gaineko xehetasunak eta izena emateko aukera topatuko dituzue langile-atarian (prestakuntzaren atalean).
