ETAPA MAILAKOAK
DBH2 | BADyG testak
Calendarren duzue antolaketa ikusgai; aztertu, mesedez. Tutoreek izango dute testak bideratzeko ardura, beraz, saioetan trukeak izango dira, tutore horiek utzitako saioak ordezkatu beharko baitira. Adi, hortaz.
DBH3 | AGIPAD bilera 3.mailako tutoreekin
Asteazkenean, koordinazio orduan 3. mailako tutoreek AGIPAD balorazio bilera izango dute, jakitun izateko.
DBH4 | Oiartzoko bisita
Hurrengo asteartean, hilak 7, 4. saioan Oiartzoko hainbat irakasle etorriko dira ikasleei azalpena ematera, 4E gelakoei izan ezik. Gainontzeko geletan ordutegia eten egingo da, 5. orduan saio arrunta berreskuratuko dela kontuan izan.
Beste zaintzarik beharko balitz 4. orduan, “libre” geratutako horiekin kontatuko dugu.
Klaustroa, otsailak 6
Hemen duzue gai zerrenda ikusgai. Ordubete iraungo du Anartz eta Egoitzen azalpenak, eta beste ordu erdian etapako gaiez arituko gara. Bestelako gairik izanez gero, jakinarazi eta bideratuko dugu. Mila esker aldez aurretik.
DBH2 | Ebaluazio diagnostikoa 2023
Otsailaren 23an eta 24an kanpo ebaluazioan parte hartuko dute gure ikasleek. Antolaketari eta bideraketari buruzko xehetasunak aurrerago emango dizkizuegu.
DBHko ikasleen aldizkaria
Kostata baina kalean da Aldizkaria! Komunikazio Tailerreko ikasleok Euskaraz Biziko zenbait kiderekin batera, aldizkari hau osatu dugu. Pasa den urteko atalez gain, beste zenbait gai gehitu ditugu, Kilometroak 2023 esaterako. Musika eta film proposamenak, elkarrizketak, errezeta goxoak, sekretutxoak… Denetik aurkituko duzue bertan. Gozatu eta asteburu on!
IKASTOLA MAILAKOAK
Matrikulazio-kanpaina 2023-24: hainbat ohar
TESTUINGURUAREN AURRETIAZKO AZTERKETA
Batzuek jaso dituzue eta besteek datorren astean jasoko dituzue (klaustroetan) matrikulazio-kanpaina martxan jarri aurretik egin ohi dugun herriko testuinguruaren azterketaren azpimarra nagusiak. Hala nahi izanez gero, xehetasunak hemen dituzue ikusgai.
INFORMAZIO ZABALTZEKO LAGUNTZA-ESKAERA
Zuen inguruan interesa izan dezakeen edonori Ikastolari lotutako informazio hau helarazten laguntzea eskertuko genizueke.
- 2023-24 ikasturterako matrikulazio-garaia: otsailak 13-24
- Ate irekiak (HH): otsailaren 6an (euskaraz) eta 9an (gaztelaniaz), 17:30ean Esmalterian
- Talde txikitako bisitak (HH) eta bakarkako hitzorduak (HH, LH eta DBH): www.oreretaikastola.eus
- Informazio gehiagorako: 943 52 03 97 edo matrikulazioa@oreretaikastola.eus
HERRIKO HEZKUNTZA ZINEGOTZIAREN AGERRALDIA ADMINISTRAZIOPEKO HIRU IKASTETXEEKIN
Urtero legez, herriko hezkuntza zinegotziak agerraldia egin du aste honetan administraziopeko hiru ikastetxeetako zuzendariekin. Hemen irakur dezakezue albistea. Aldiro adierazten dugu Ikastolak ere eskertuko lukeela babes hori, baina ezezko erantzuna jasotzen dugu.
Kilometroak 23: hainbat aipamen
KILOMETROAK TXIKIA
Pasa den urtarrilaren 28an ospatu genuen Kilometroak Txikia, Kilometroak urteko lehen hitzordua. Eskerrik asko hura posible egin zenuten langile guztiei! Langile atarian topatuko dituzue laburpen-bideoa eta argazki-galeria.
URTEKO MUGARRI NAGUSIEN AURKEZPENA
Pasa den astean aurreratu bezala, herriko eta Euskal Herriko hainbat eragilerekin batera Kilometroak urteko mugarri nagusiak aurkeztu ditugu aste honetan Lekuona Fabrikan. Langile-atarian topatuko dituzue agerraldiaren bideoa eta mugarri nagusien nondik norakoak.
SANTA AGEDA BEZPERAKO KOPLAK
Ohi legez, Santa Ageda bezperan, bihar, kopla kantari ibiliko dira Ereintza Elkartea eta Xenpelar bertso eskola. Urtero, kantubiraren amaieran, urteko azpimarraren bat izaten dute hizpide eta aurten Kilometroak izango da horietako bat. Propio guretzako egindako bertso batzuk kantatuko dira herriko enparantzan, gaueko 21:00ak aldera. Gustu baduzue, gonbidatuta zaudete hitzordura.
Lilatoia: emakumeok, anima zaitezte!
Ziurrenik askok jakingo duzuenez, DBHko hainbat ikasle zein irakaslek Lilatoian parte hartzeari ekin zioten orain hiruzpalau urte, elkarrekin igande goiza kirola eginez pasa eta aldarrikapenez betetzeko asmoz.
Orain arteko esperientzia oso atsegina eta asegarria izan denez, aurten ere, jarraipena eman nahi zaio. Martxoaren 5ean izango den Lilatoian parte hartzeko asmoa dago eta zuek, Ikastolako langile emakumeok, ere horretara animatu nahi zaituztegu. Ikastolako taldera batzera.
Ikastolako taldearen xehetasunak aurrerago emango dizkizuegu, Kilometroak urtea eta Ikastolaren 60. urteurrena ere badenez gauzak prestatzen baikabiltza. Bien bitartean, ezinbestekoa da www.lilaton.es webgunean izena ematea lehenbailehen; dortsalik gabe ez geratzeko. Egizue hori orain eta, esan bezala, laster izango duzue gure berri. Horratx erronka: baietz Orereta Ikastolak dituen urte adina emakume korrikalari batu taldera!
Formazioa eta prestakuntza: eskaintza berria
Lanbidek antolatutako ikastaro batzuen gaineko xehetasunak eta izena emateko aukera topatuko dituzue Langile-atarian (prestakuntzaren atalean).
