Familientzako ate irekien saioa egingo du Oiartzo Ikastolak apirilaren 9an arratsaldeko 17:30ean, batxilergo-ikasketak egiteko aurrematrikula-epea ireki berritan (apirilaren 8tik 19ra artekoa izango da aurrematrikula-epea). Ikastola ezagutu eta zalantzak argitzeko saioa izango da. Ez da beharrezkoa aurrez hitzordua hartzea.
Oiartzon batxilergo-modalitate nagusiak eskaintzen dira, osteko edozein ikasketetarako sarbidea ahalbidetuz. Horrez gain, Oiartzon ikasleek beren interesen arabera aukera ditzakete aukerako gaiak, modu guztiz askean.
Oiartzo Ikastola, hurbil urrunera begira
Oiartzungo Haurtzaro eta Orereta Ikastolek 90. hamarkadaren amaieran jarri genuen martxan Oiartzo, bi Ikastoletako ikasleei zein eskualdeko gazteei batxilergo euskalduna, hurbila, kalitatezkoa eta aukera zabalekoa eskaintzeko helburuz. Haurtzaro eta Orereta Ikastolak bezalaxe, Oiartzo ere Euskal Herriko Ikastolen Elkarteko kide da, kalitatezko euskarazko hezkuntza berritzailearen berme. Gaztetasuna eta esperientzia uztartzen dituen lantalde egonkorra ditu. Besteak beste, ikasleen emaitzak dira horren guztiaren lekuko.
Informazio eta xehetasun gehiagorako: www.oiartzoikastola.eus
