HIZKUNTZAK

(Iturria: Osakidetza)

Indarrean dauden protokoloen arabera, Covid-19 kasu baten kontaktu estutzat hartu da zure seme-alaba. Laster, Zaintza Sarearen deia jasoko duzue, bere kasua banan-banan ebaluatzeko, informazio gehiago emateko eta proba diagnostikorako hitzordua programatzeko.

Kutsadurak saihesteko, kontaktu estu gisa identifikatutako pertsonak honako neurri hauek hartu behar ditu:

Etxean berrogeialdia egin

  • Zure seme-alabak etxean egon behar du; ezin da eskolara edo ikastetxera joan, eta ezin du bisitarik jaso. Berrogeialdi horrek 10 eguneko iraupena izango du gutxienez, kasuarekin harremanetan jarri den azken egunetik aurrera.
  • Zure seme-alabak berrogeialdia egin behar du, proba diagnostikoaren emaitza edozein dela ere. Duela gutxi kasu batekin kontaktuan egon bada eta proba negatiboa bada, baliteke birusa inkubatzen aritzea eta hurrengo egunetan positibo bihurtzea.
  • Ahal den neurrian, gainerako bizikideengandik bakartuta egon behar du. Etxe barruan segurtasun-distantziari eta maskarari buruzko prebentzio-neurriak ere mantentzea gomendatzen da. Garrantzitsua da, halaber, zaintzaileak ahalik eta gutxien izatea eta topaketak murriztea.
  • Kontaktu estua den pertsonaren senideek ez dute berrogeialdirik egin behar, ikaslea kontaktu bat den bitartean, eta ez COVID kasu bat.

* Zure seme-alabak txertaketa-jarraibide osoa jaso badu eta inolako sintomarik ez badu, edo azken 180 egunetan COVID-19aren infekzioa igaro badu eta kontaktu estutzat hartu badute, berrogeialditik salbuetsita egongo da, baina pertsona zaurgarriekin eta txertorik gabeko pertsonekin kontakturik ez izatea gomendatuko zaio. Era berean, gizarte-interakzioetan maskara erabiltzeko, ekitaldi jendetsuetara ez joateko eta sintoma bateragarrien agerpena zaintzeko adieraziko zaio.

Esku-garbitzea eta etxearen aireztatzea

  • Eskuak maiz garbitzeak, garbitasuna areagotzeak eta etxea ahalik eta denbora gehien aireztatzeak gaixotasuna etxean transmititzeko aukerak murrizten ditu

Sintomen zaintza

  • Seme-alabari tenperatura 12 orduan behin hartu eta Covid-19arekin bateragarriak diren sintomen agertzea zaindu. Adingabeak edo bere inguru hurbileko pertsonaren batek (beste adingabe edo heldu batzuk) Covid-19arekin bateragarriak diren sintomak garatzen baditu hurrengo egunetan, bere etxean egon beharko du, eta bere osasun-zentroarekin harremanetan jarri beharko du, telefonoz.

Itxaron Zaintza Sarearen deia jaso arte. Kontsultaren bat egin behar baduzu, Osasun Aholkura ere dei dezakezu (900203050).

Eusko Jaurlaritzako Osasun Sailaren webguneko COVID-19ari buruzko Informazioa atalean informazio gehiago kontsulta eta deskarga dezakezu.

https://www.euskadi.eus/coronavirus /